Lo movement Assemblada Occitana constata un còp de mai, sens suspresa, que l’estat francés blòca la promocion de la lenga occitana e de las autras lengas minoritàrias. Lo Conselh Constitucional francés ven de mutilar la Lei Molac que cèrca de defendre las lengas minoritàrias.
Lo Conselh Constitucional francés censura dos ponches de la Lei Molac:
  • Enebís l’ensenhament immersiu en lenga occitana dins las escòlas publicas.
  • Enebís de registrar dins l’estat civil los prenoms occitans que tenon de signes diacritics occitans quand son pas coneguts en francés (á í ó ò ú n·h s·h).
Lo Conselh Constitucional pren coma pretèxt l’article 2 de la constitucion francesa que ditz que “La lenga de la Republica es lo francés”.
Aquò es ben una ataca contra nòstra lenga occitana e contra nòstra libertat de l’utilizar dins l’espaci public. L’occitan es ja en posicion extrèmament fragila, e ara l’estat francés accentua sa fragilitat en impausant una interpretacion de mai en mai restrictiva de la constitucion.
En realitat, l’article 2 de la constitucion auriá pogut recebre una interpetacion pus dobèrta e pus logica qu’autorizèsse l’usatge de las lengas minoritàrias, coma o dison fòrça juristas. Mas l’aparelh de l’estat francés impausa una interpetacion liberticida, lingüicida e etnocida que va contra los dreches umans e contra la diversitat culturala.
La lei Molac, desenant, es mutilada mas pas completament demolida. Garda de mesuras importantas que poirián permetre qualques avançadas modèstas:
  • Encoratja una ofèrta d’ensenhament facultatiu de l’occitan dins las escòlas publicas (mas es pas un ensenhament immersiu).
  • Prevei una ajuda quand un enfant va dins una escòla en defòra de sa comuna per i seguir de corses d’occitan.
  • Encoratja las inscripcions publicas e visiblas en occitan.
  • Totun, sabèm fòrça ben que l’estat francés o farà tot per frenar l’aplicacion d’aquesta lei, e mai dins sa version mutilada.
Per lo movement Assemblada Occitana, es clar que caldrà perseguir las mobilizacions.
  • Sostenèm las manifestacions de defensa de la Lei Molac que se preparan dins diferentas vilas, lo 29 de mai de 2021.
  • Sostenèm lo coratjós deputat breton Paul Molac qu’anóncia que prepausarà una reforma de constitucion per metre fin als blocatges perpetuals.
  • Confirmam que lo blocatge absurde que ven de l’estat francés accentua l’etnocidi qu’es en cors: aquò rend completament legitima la volontat de rompedura amb l’estat francés. L’independéncia politica d’Occitània —dels Alps a l’Atlantic— es un objectiu de mai en mai necessari per que nòstre pòble occitan aja drech de viure amb sa lenga, sa cultura e sa personalitat.

FER UN COMENTARI

Please enter your comment!
Please enter your name here