A continuació reproduïm el comunicat de l’Assemblada Occitana sobre la recent aprovació a França de la llei de llengües minoritàries:

” L’Assemblada Occitana es fòrça aürosa que la novèla lei Molac, en favor de las lengas minoritàrias, siá adoptada per lo Parlament francés. Felicitam son impulsor, lo coratjós deputat breton Paul Molac. Tanben felicitam las associacions e los elegits que se son mobilizats per far passar aquela lei malgrat l’ostilitat dels jacobins.

La lei Molac desblòca de mesuras importantas per promòure l’occitan e d’autras lengas:
  • Encoratja una ofèrta d’ensenhament facultatiu de l’occitan dins las escòlas publicas.
  • Autoriza l’ensenhament immersiu en occitan dins las escòlas publicas.
  • Installa una ajuda quand los enfants van dins d’escòlas occitanas en defòra de lor comuna.
  • Encoratja las inscripcions publicas e visiblas en occitan.
  • Obliga l’administracion d’acceptar los prenoms occitans amb de signes non franceses coma “í” o “ò” dins “Alícia” o “Jòrdi”.
De segur, l’Assemblada Occitana es conscienta que l’estat francés jacobin metrà de frens per aplicar aquela lei. De partits e de pseudointellectuals jacobins menaràn una guèrra bruta contra aquela lei. Ja sabèm que los partits LFI e LREM son entre los mai ostils a las lengas minoritàrias. Nos en sovendrem.
La lei Molac es un progrès bèl mas demòra insufisenta. Per una promocion eficaça de l’occitan, caldrà adoptar de mesuras suplementàrias:
  • Ajuda a las familhas ont los parents parlan occitan als enfants.
  • Ensenhament obligatòri de l’occitan dins totas las escòlas, formacion massissa d’ensenhaires en occitan.
  • Estatut de lenga oficiala per l’occitan dins tota Occitània, dels Alps a l’Atlantic.
  • Drech d’utilizar l’occitan dins totes los domenis de la vida publica e professionala.
  • Installacion ambiciosa de l’occitan dins los mèdias.
  • Sosten massís a la literatura e a la musica en occitan.
  • Sosten massís a la produccion audiovisuala en occitan (cinèma, telefilmes…).”